კომპანიამ, რომელიც ისრაელის მოქალაქე გავრიელ ბინიაშვილმა და არქიტექტორმა ირაკლი შარაშიძემ, 2022 წლის ბოლოს დააარსეს, თბილისში, ბარნოვის ქუჩის ვიწრო ჩიხში, კულტურული მემკვიდრეობის ძეგლებს შორის, მულტიფუნქციური კომპლექსის მშენებლობა დაიწყო. 

კომპანიაში N A In Georgia  წილებს ბინიაშვილი და შარაშიძე, ორ თანაბარ ნაწილად, იყოფენ. 

გავრიელ ბინიაშვილის საინვესტიციო ფონდის Binyamin Investment Management Fund ვებ-გვერდზე ბარნოვის ქუჩის სამშენებლო პროექტი აღწერილია, როგორც სივრცე, რომელიც გაიყიდება და გაქირავდება, უფრო მეტად ახალგაზრდა სტარტაპერებსა და ფრილანსერებზე, როგორც საერთო საცხოვრებელი და სამუშაო ადგილი. 

სამშენებლო ნებართვა თბილისის მერიის არქიტექტურის სამსახურმა გასულ წელს გასცა. არსებული ნებართვით, მშენებლობა 2027 წლის 25 აგვისტოს უნდა დასრულდეს.  

მერიამ 2017 წელსაც გასცა ბარნოვის ქუჩაზე სასტუმროს მშენებლობის ნებართვა და გასულ წელსაც. ორი ახალი მშენებლობა დამატებით დატვირთავს ბარნოვის ქუჩას, რომლის გეოლოგიური მდგომარეობა ისედაც გაუარესებულია. 

ამჟამად ბარნოვის ქუჩის ამ ჩიხში დაახლოებით 80 ადამიანი ცხოვრობს. ახალი ხუთსართულიანი შენობა კი, რომელსაც მიწის ქვეშ ორი სართული ექნება, ურბანულად კიდევ უფრო დატვირთავს ისედაც ვიწრო ჩიხს. 

საპროექტო შენობის სიმაღლე 26.88 მეტრი იქნება: 19.28 მეტრი სიმაღლით, 7.6 მეტრი მიწის ქვეშ, რაც უფრო დაბლაა, ვიდრე იქ არსებული გრუნტის წყლები. სასტუმრო დაახლოებით რვა მეტრით მაღალი იქნება ბარნოვის პირველი ჩიხის ერთ-ერთ მომიჯნავე სახლზე. 

საპროექტო დოკუმენტებში, რომელიც “კაქტუსმა” თბილისის მერიის არქიტექტურული სამსახურიდან მოიპოვა, არსად არის ნახსენები, საიდან მოხდება შენობის წყლით მომარაგება. კანალიზაციისა და სანიაღვრე სისტემის ყველაზე ახლო და ლოგიკური ადგილი ბარნოვის ჩიხია. ადგილის რთული რელიეფიდან გამომდინარე, კომპანიას მნიშვნელოვანი საკითხი ცალკე უნდა ჰქონდეს განხილული, მაგრამ პროექტში, რომელიც მერიამ მოგვაწოდა, წყალარინების სისტემა აღწერილი  არ არის.

 

მოსახლეობის საჩივარი

ადვოკატმა ნატა ქარჩაიძემ და მისმა მეზობლებმა მათი სახლის ახლოს მერიის არქიტექტურის სამსახურის მიერ გაცემული სამშენებლო ნებართვები ჯერ მერიაში, შემდეგ კი თბილისის საქალაქო  სასამართლოში გაასაჩივრეს და მოითხოვეს როგორც სამშენებლო ნებართვის ბათილად ცნობა, ასევე გაცემული სამშენებლო ნებართვების მოქმედების შეჩერება, სასამართლოს მიერ საბოლოო გადაწყვეტილების მიღებამდე.

თბილისის საქალაქო სასამართლოს მოსამართლე ზვიად გოჩაშვილმა სამშენებლო ნებართვების მოქმედების შეჩერებაზე მოსარჩელეების მოთხოვნა არ დააკმაყოფილა. მოსარჩელეებმა საქალაქო სასამართლოს განჩინება სააპელაციო სასამართლოშიც გაასაჩივრეს, მაგრამ ის, წინა ინსტანციის მსგავსად, არც სააპელაციო სასამართლოს ადმინისტრაციულ საქმეთა პალატის მოსამართლე დავით ახალბედაშვილმა დააკმაყოფილა.

საქალაქო სასამართლოს მოსამზადებელი სხდომა ამ საქმესთან დაკავშირებით ჯერ არ გამართულა.

“თბილისის მუნიციპალიტეტის მერიის არქიტექტურის სამსახურის მიერ გამოცემული სამშენებლო გადაწყვეტილებები ყველა არაკანონიერი აქტია,” - ამბობს ნატა ქარჩაიძე, რომელიც ბარნოვის #8-ში, ავარიულ სახლში, ცხოვრობს. სახლს კულტურული მემკვიდრეობის ძეგლის სტატუსი აქვს. 

ახალი მშენებლობის პოტენციური დატვირთვა

ბარნოვის ქუჩის დაღმართი ვიწრო და მუდამ დატვირთულია. მოძრაობა ცალმხრივია: ავტომობილები ზემოდან ქვემოთ მოძრაობენ.

კონსტრუქციული პროექტის თანახმად, ადგილიდან დაახლოებით 10 765 კუბური მეტრი გრუნტი უნდა გაიტანონ, რისთვისაც 8 კუბური მეტრი ტევადობის თვითმცლელმა დაახლოებით 1 400-ჯერ უნდა გაიაროს. 3 000 კუბური მეტრი ბეტონის შემოტანას კი დაახლოებით 500 ბეტონმრევი დასჭირდება. 

მაყაშვილის და ბარნოვის ქუჩის კვეთაზე დიდი მანქანების მოძრაობის შემზღუდავი გაბარიტული ბოძები იდგა. ბოძები ზღუდავდა მაღალი გამავლობის მანქანების მოძრაობას და დაზიანებისაგან იცავდა როგორც სახლებს, ასევე გზას და მიწისქვეშა კომუნიკაციებს. 2017 წელს, ბარნოვის #10-ში სასტუმროს მშენლობისას, ბოძები მოჭრეს და მას მერე აღარ დაუყენებიათ. 

საავტომობილო უბედური შემთხვევა ბარნოვის ქუჩის ვიწრო დაღმართზე | 2017 

 

მშენებლობის მიმდინარეობისას ბეტონმრევები ზემოდან ქვემოთ ვერ ივლიან: დატვირთული მანქანების მუხრუჭებზე ზეწოლის და ავარიების რისკები იმატებს. ერთი გამოსავალია ქვემოდან ზემოთ ასვლა. თუკი ბარნოვის ქუჩის ზედა ნაწილში მოძრაობა პატრულმა არ გააკონტროლა, ურთიერთსაპირისპიროდ მოძრავი მანქანები ერთმანეთს ხელს შეუშლიან. 

გრუნტის გაზიდვასა და ბეტონის შემოტანასთან ერთად, მდებარე სახლებს დამატებით პრობლემას შეუქმნის სახლის ხიმინჯებისთვის საჭირო ბურღვა. 

ძმები კაკაბაძეების #13 სახლის შიდა ეზო, რომელიც სამშენებელო მიწას უშუალოდ ესაზღვრება

42 ხიმინჯის მოსაწყობად აუცილებელი ბურღვით გამოწვეული ვიბრაცია, დიდი ალბათობით, კიდევ უფრო დააზიანებს ან დაანგრევს უკვე ავარიულ მდგომარეობაში მყოფ, გაბზარულ სახლებს, მათ შორის, სამ კულტურულ ძეგლს, რითად ირღვევა "საქართველოს კანონის კულტურული მემკვიდრეობის შესახებ".

კულტურული მემკვიდრეობის ძეგლები

ლურჯჩუქურთმებიანი, აგურით ნაშენები სახლი სამშენებლო მოედანს ჩრდილოეთით, ძმები კაკაბაძეების ქუჩის #13-ის პატარა ეზოში ესაზღვრება. ეს სახლიც ავარიულ მდგომარეობაშია: კედლებზე ბზარები ეტყობა და რესტავრაცია მხოლოდ ნაწილობრივ უცვლის მას ძველ იერ-სახეს. სახლის ჭიშჯარზე 1891 აწერია, რაც მისი აშენების სავარაუდო თარიღია.

სახლის ფასადი ძმები კაკაბაძეების ქუჩის #13-ში 

 

ნინო ბახტაძე ძმები კაკაბაძეების ქუჩის სახლის თავმჯდომარეა. მისი საცხოვრებელი ოთახები მეორე სართულზეა და პირდაპირ შეჰყურებს გავრიელ ბინიაშვილის მიწის ნაკვეთს. ნინოს ინფორმაცია არ ჰქონდა, რომ ამ მიწის ნაკვეთზე სამშენებლო ნებართვაა გაცემული. 

“ვერ წარმომიდგენია, როგორ უნდა ვიცხოვროთ აქ: მტვერი, ხმაური, ნგრევა დაიწყება და კიდევ უფრო დააზიანებს ჩვენს სახლს,” - ამბობს ნინო ბახტაძე.

 

გეოლოგიური დასკვნა ახალ მშენებლობაზე 

საინჟინრო-გეოლოგიური კვლევის საექსპერტო დასკვნას  93 წლის ასაკში მყოფი გეოლოგის - გუგა ჭოხონელიძის ბეჭედი აქვს დასმული, რომელიც 2023 წელს, დასკვნის გამოცემიდან სამი წლის შემდეგ, გარდაიცვალა. 

სამშენებლო მიწის ფართობი 2 274 კვადრატული მეტრია. აქედან მიწის ფართობი, სადაც უშუალოდ შენობა დაიდგმება, 900 კვადრატულ მეტრამდეა. 

ამ ადგილის მდებარეობიდან [ციცაბო კალთა] და მიწის ფართობიდან გამომდინარე, იქ, მინიმუმ, 4-6 ჭაბურღილი მაინც უნდა გაეთხარათ, დაახლოებით 10-15 მეტრის სიღრმის, რომ გეოლოგიური შეფასება მეტ-ნაკლებად მომცველი ყოფილიყო. არსებული დოკუმენტის მიხედვით კი, ბარნოვის პირველი ჩიხის № 10 -ში მდებარე მიწის ნაკვეთზე  მხოლოდ 3 ჭაბურღილი გათხარეს.

საექსპერტო დასკვნაში წერია, რომ დაახლოებით 7 მეტრში არის გამოუფიტავი ქანი. გამოუფიტავ ქანში კიდევ დაახლოებით 3 მეტრით შესვლა იქნებოდა სასურველი, როცა უკვე მყარი საყრდენი ნაპოვნი იქნებოდა და რაზეც დაფუძნება შესაძლებელია.

უსაფრთხოების ერთ-ერთი საკითხი ისიცაა, რომ ბარნოვის პირველი ჩიხის №10-ში მდებარე მიწის ნაკვეთზე დაგეგმილი ახალი მშენებლობა ძალიან ახლოს მიდის კულტურული მემკვიდრეობის სტატუსის მქონე საცხოვრებელ სახლებთან. როცა შენობა 50 სანტიმეტრით მიდის სახლთან, ის აუცილებლად შეეხება გვერდით გრუნტს. ეს აუცილებლად მოახდენს ზეგავლენას ამ შენობაზე [ძეგლზე], რომელსაც, სავარაუდოდ, ცუდი დაფუძნება აქვს. კარგი დაფუძნების შემთხვევაშიც კი აუცილებელია მინიმუმ 5-მეტრიანი დაშორება.

გეოლოგიური კვლევის საექსპერტო დასკვნაში ასევე ნახსენებია სამი შურფი, რომელიც მომიჯნავე სახლებს გაუკეთდა, რაც საკმარისი არაა მათ სრულფასოვნად შესაფასებლად: ყველა შენობას, რომელიც გარშემოა, სათითაოდ უნდა გაუკეთდეს შურფები და გამოიხაზოს ყველა მათგანის საძირკველი. 

ასეთ დროს, გეოლოგები მოსახლეობას სთხოვენ ხოლმე, რომ სარდაფებში ჩაიყვანონ. თუ სარდაფი ღრმაა, ეს დიდი ინფორმაციის მატარებელია. შურფი ერთგვარი თხრილია, რასაც გეოლოგები თხრიან ნიადაგის სხვადასხვა თვისებებისა და გრუნტის წყლის შესასწავლად. ნატა ქარჩაიძე, ბარნოვის ქუჩის #8 ამხანაგობის თავმჯდომარე, ამბობს, რომ მათთან სახლის შურფის გასაკეთებლად არავინ მისულა.

გუგა ჭოხონელიძის ჩანაწერი, რომელიც გეოლოგიური ანგარიშის საექსპერტო დასკვნაშია, დიდი ალბათობით, გადაუმოწმებელია. ასე ხშირად ხდება: საექსპერტო დასკვნას გეოლოგი ისე წერს, რომ ადგილზე არ მიდის, დოკუმენტში ნახსენები მონაცემების გადასამოწმებლად. 

საინჟინრო-გეოლოგიური კვლევის საექსპერტო დასკვნაში ასევე ნახსენებია, რომ გრუნტის წყლის ქიმიური შემადგენლობა გამოიკვლიეს, მაგრამ მისი შედეგები დოკუმენტს არ ახლავს.

გრუნტის წყლის ქიმიური შემადგენლობა მნიშვნელოვანია შენობის საინჟინრო დაგემგვისა და საშენებლო მასალების გამოყენების კუთხითაც: გრუნტის წყლის ქიმიური ანალიზით ჰიდროლოგები იგებენ მის აგრესიულობას, კოროზიულობას, რასაც შემდეგ ინჟინრები სამშენებლო მასალების არჩევის დროს ითვალისწინებენ: მაგალითად, ისეთი ცემენტს ირჩევენ, რომელიც ამ კონკრეტული გრუნტის წყლის მიმართაც მდგრადია, ან სხვადასხვა, შესაბამის, მინარევებს უმატებენ. 

 

რეკრეაციული ზონა

ვასილ ბარნოვის პირველი ჩიხის № 10-ში მდებარე მიწის ნაკვეთს, სადაც მულტიფუნქციური სახლი უნდა აშენდეს, რეკრეაციული ზონა 2-ისა და თბილისის სატყეო ზონის სტატუსი ერთდროულად აქვს. მთაწმინდის მთის ფერდი, რომელიც რომელსაც უშუალოდ ემიჯნება მიწის ნაკვეთი, ტერასულად არის გამწვანებული კვიპაროსებით და სხვა მრავალწლიანი ნარგავებით.

წყარო: maps.tbilisi.gov.ge 

გამწვანებულ ტერიტორიაზე 156 ძირი საღი მწვანე ნარგავი დგას, რომელიც 682.2 კვადრატულ მეტრს იკავებს. პროექტის მიხედვით, მათი ნაწილი ადგილზე დარჩება, ნაწილი მოიჭრება და ნაწილი - იქვე გადაირგვება. 

 

კიდევ ერთი სასტუმრო, რომელიც ბარნოვის ქუჩაზე 8 წლის წინ აშენდა

ბარნოვის ქუჩაზევე, რომელიც ისტორიული განაშენიანების უბანია, რამდენიმე მეტრით მაღლა, ოთხსართულიანი სასტუმრო შვიდი წლის წინ აშენდა. სამშენებლო ნებართვა ადგილობრივებმა 2017 წელსაც გაასაჩივრეს. სასამართლო პროცესი ხუთი წელი გაიწელა. 

ოთხსართულიანი სასტუმროს მშენებლობა უკვე დამთავრებული იყო, როცა მოსამართლე ივანე აღნიაშვილმა ხუთი წლის წინ დაწყებული საქმის საბოლოო სხდომა 2022 წლის 9 ივნისს გამართა და მხარეების არგუმენტები მოისმინა. 21 დღის შემდეგ კი გამოაცხადა, რომ მათი სარჩელი არ დაკმაყოფილდა. 

ოთხსართულიანი სასტუმროზე ლევან სამხარაულის სახელობის საექსპერტო ბიუროს დასკვნა ჰქონდა გაცემული, რომ ზიანს მოუტანდა ბარნოვის ქ. N 8-ში მდგომ შენობას [ძეგლს] და N49 საჯარო სკოლის შენობას [ასევე ძეგლს], გასაჩივრებიდან ხუთი წლის შემდეგ გამართული სხდომა ისედაც აზრს მოკლებული იყო, რადგან სასტუმრო უკვე მუშაობდა და ინვესტორი შემოსავალს იღებდა. 

სასტუმრო ბარნოვის ქუჩის #10-ში, რომელიც “თრიფელ ეიმ” 2018 წელს ააშენა. ფოტო: კაქტუსი 

ეს სასტუმრო, რომელიც 49-ე სკოლის გვერდით დგას, დღემდე მერიას ექსპლოატაციაში არ მიუღია: შენობის ტექნიკური შესაბამისობა შეთანხმებულ პროექტთან გადამოწმებული ახლაც არ არის. 

ახალი ნებართვით კი, რომლის თანახმადაც ამ სასტუმროს ქვემოთ, მთაწმინდის ციცაბო კალთასთან ახლოს, 26-მეტრიანი მულტიფუნქციური შენობა ისტორიული განაშენიანების ზონაში, კულტურული მემკვიდრეობის სტატუსის მქონე ძეგლებს შორის, აღიმართება. ცნობილი არ არის მისი პოტენციური გავლენა გარშემო მდგარ ავარიულ ძეგლებზე.

ნატა ქარჩაიძის საცხოვრებელი სახლი სამშენებლო მიწის ნაკვეთთან ახლოსაა. მის სახლს კულტურული მემკვიდრეობის უძრავი ძეგლის სტატუსი აქვს და ავარიულ მდგომარეობაშია: შპს თბილისის მუნიციპალური ლაბორატორიის დასკვნების თანახმად, მათი მდგომარეობა ავარიულობის III [მესამე] ხარისხს შეესაბამება. შესაბამისად, ვასილ ბარნოვის პირველი ჩიხის №10-ში მდებარე მიწის ნაკვეთზე სამშენებლო ნებართვები, რომელიც თბილისის მერიის არქიტექტურის სამსახურმა გასცა, რამდენიმე კანონს არღვევს.

“კულტურული მემკვიდრეობის შესახებ” კანონის მიხედვით, ძეგლის ფიზიკური დაცვის არეალი განისაზღვრება შემდეგი ფორმულით: ძეგლის სიმაღლე გამრავლებული ორზე, არანაკლებ ორმოცდაათი მეტრის რადიუსით. შენობა, რომელიც ბარნოვის პირველი ჩიხის № 10 -ში მდებარე მიწის ნაკვეთზე ამ ნებართვით უნდა აშენდეს, ბარნოვის ქუჩა № 8-ზე კულტურული მემკვიდრეობის ერთ-ერთი ძეგლიდან მხოლოდ 50 სანტიმეტრით იქნება დაშორებული, რაც არღვევს არა მხოლოდ ძეგლის ფიზიკური დაცვის არეალს, არამედ ჩვეულებრივ შენობებისთვის დადგენილ სამეზობლო მიჯნასა და უსაფრთხოების ნორმებს. 

სამშენებლო ქვაბული 

ვასილ ბარნოვის პირველი ჩიხის № 8-ში მდებარე შენობების უშუალო სიახლოვეს, დაახლოებით 3-4 მეტრში, თბილისის მუნიციპალიტეტის მერიის არქიტექტურის სამსახურის მიერ გაცემული სამშენებლო ნებართვით, 2007 წელს ამოიჭრა ღრმა სამშენებლო ქვაბული.  

იქ მშენებლობა არ გაგრძელდა, ქვაბული ღიად დარჩა და დღემდე ღიად არის დატოვებული, სათანადო გამაგრების და კონსერვაციის გარეშე. 

18 წლის მანძილზე ღიად დატოვებულ სამშენებლო ქვაბულში ჩაედინება ნალექი, გრუნტის წყლები, მიწა ჯდება, ეროზირდება. მოსახლეობის თხოვნის მიუხედავად, რომ თბილისის მუნიციპალიტეტის მერიას ან მთაწმინდის გამგეობას ამოევსო ეს ქვაბული, პასუხობდნენ, რომ ბარნოვის ქუჩის № 2-6 “კერძო ტერიტორიაა და ვერ შეეხებიან.”

ბარნოვის ჩიხის ღრმა ქვაბულში ამჟამად ჩაედინება როგორც საყოფაცხოვრებო, ასევე კანალიზაციის წყალი. მოსახლეობა მას ნაგავსაყრელადაც იყენებს 

 

გაუარესებული გეოლოგიური მდგომარეობა ბარნოვის ქუჩის დასაწყისში

2008 წელს, ბარნოვის ქუჩის დასაწყისში, სადაც ახლა ქვაბულია, მშენებლობის დაწყება უნდოდათ, მაგრამ ფერდობი ჩამოინგრა და საჭირო გახდა მისი გამაგრება. ფერდობზე ბეტონის ბლოკები მოეწყო - საყრდენი კედელი. გართულდა ხიმინჯების გაყვანის პროცესიც [ხიმინჯი ის კონსტრუქციაა, რომელსაც მთელი შენობა ეყრდნობა].

“ხიმინჯების უფრო ღრმად გაყვანა შეწყდა. მუშაობა გაართულა მიწისქვეშა წყლების მოდენამაც. მათი ამოტუმბვა კარგად ვერ მოხერხდა,” - წერია გეოლოგიურ დასკვნაში.

გეოლოგების თქმით, სასურველია, რომ ხიმინჯი ძირითად ქანებამდე დავიდეს, რომ შენობის სიმყარე გარანტირებული იყოს. დროებითი ხიმინჯი მაშინ ინჟინრებმა კენჭნარ გრუნტებზე დაამყარეს, 1 მეტრამდე დატკეპნეს.

მოგვიანებით აღმოჩნდა, რომ კენჭნარი ფუძე ვერ უზრუნველყოფდა 9-სართულიანი შენობის მდგრადობას. ხიმინჯოვანი ველის მოედანიც მოეწყო, მაგრამ მალევე გაირკვა, რომ ხიმინჯების გაყვანა საფრთხეს უქმნიდა მეზობელ სახლებს, ამიტომ ხიმინჯების გაყვანა აუცილებელი გახდა ხელით. 

დოკუმენტი, რომელიც თბილისის მერიის არქიტექტურის სამსახურის ვებ-გვერდზე არის გამოქვეყნებული, საინჟინრო-გეოლოგიური დასკვნაა ამ ქვაბულზე. დოკუმენტი ორ, ძველ და შედარებით ახალ, დასკვნას აერთიანებს: ერთი 2017-ში ჩატარდა და მეორე - 2004-ში. ერთში [2017] წერია, რომ საინჟინრო-გეოლოგიური კუთხით მესამე [რთულ] კატეგორიის განეკუთვნება, მეორე [2004] დოკუმენტის მიხედვით კი - მეორე, საშუალო სირთულის.

ახალი დოკუმენტის მიხედვით, შენობა უნდა იყოს 9-სართულიანი, ხოლო ძველი დოკუმენტის მიხედვით - 6 უნდა ყოფილიყო. ანგარიშები 13 წლის შუალედით შესრულდა და ამ პერიოში საინჟინრო-გეოლოგიური პირობები ერთი ნიშნულით გაუარესდა.