ხვალ, 2 აგვისტოს, 14:30 საათზე, სასტუმროში „ჰოლიდეი ინნში," თბილისის აგლომერაციის ატმოსფერული ჰაერის ხარისხის მართვის 2024-2026 წლების გეგმის პროექტის საჯარო განხილვა გაიმართება.
დოკუმენტების პაკეტი ევროკავშირის მხარდაჭერით, საქართველოს გარემოს დაცვისა და სოფლის მეურნეობის სამინისტროს კოორდინაციით, შეიქმნა.
გეგმის მიზანია სახელმწიფო უწყებებისა და ქ. თბილისის და მისი მიმდებარე მუნიციპალიტეტების ჩართულობით სათანადო ღონისძიებების გატარება თბილისში ატმოსფერული ჰაერის ხარისხის გასაუმჯობესებლად.
სუფთა ჰაერის არსებობა საქართველოს მოქალაქისთვის კონსტიტუციის 29-ე მუხლით მინიჭებული უფლებაა.
აქამდე არსებული მონაცემები
დოკუმენტის მიხედვით, ქალაქ თბილისის ატმოსფერულ ჰაერში დასაშვებ ნორმას აჭარბებს როგორც მყარი ნაწილაკების [PM 10 და PM 2.5], ასევე აზოტის დიოქსიდის კონცენტრაციები, რომელთა წყაროები სატრანსპორტო საშუალებებია.
სამიზნეები
გეგმის საბაზისო წელია 2022, ხოლო სამიზნე - 2026 წელი.
თუკი 2022 წელს თბილისის ატმოსფერულ ჰაერში წლიურად 4 530 ტონა PM 10 და 650 ტონა PM 2.5 გამოიფრქვა, 2026 წელს ეს მონაცემი უნდა შემცირდეს და გახდეს PM 10 - 4 000 ტონა, ხოლო PM 2.5 - 600 ტონა.
ახალი ავტომატური სადგურები
ბოლო წელიწადნახევრის განმავლობაში, საქართველოში ჰაერის ხარისხის მონიტორინგის სისტემა გაფართოვდა და მას 8 ახალი ავტომატური სადგური შეემატა.
ყველა მათგანი ფონურია, რაც არ არის დადებითი მოვლენა.
ფონურია ის სადგური, რომელიც დამაბინძურებელ წყაროსთან ახლოს არ დგას.
კავშირი ჰაერის დაბინძურებასა და დავადებებს შორის რუსთავში
მონაცემების შედარებით აღმოჩნდა, რომ როცა ჰაერში მაღალია მყარი ნაწილაკების კონცენტრაცია, პარალელურად მაღალია დაავადებების რაოდენობაც.
მონაცემთა ინტერპრეტაცია
ამ კვლევის შედეგები იძლევა იმ ჰიპოთეზის გამოთქმის საშუალებას, რომ დაავადებების მატება, შესაძლოა, იყოს მჭიდრო კავშირში ჰაერის ამ ორი კომპონენტით დაბინძურებასთან.
ამის მყარად დასამტკიცებლად, საჭიროა უფრო ფოკუსირებული და დავიწროებული კვლევების ჩატარება.
დაავადებების ახალი შემთხვევების მატებას, შესაძლოა, სხვა ფაქტორებიც განაპირობებდეს, - მათ შორის ჰაერის დაბინძურება, მაგრამ არა მხოლოდ, რაც ცალკე შესასწავლია.
